22. 11. 2022:  Архієпіскоп Ґуджеротті призначеный новым префектом Дікастерії про восточны церькви

Ґуджеротті быв у минулости і нунціём на Українї.

Як інформовав портал Vatican News, в понеділёк 21-го новембра 2022-го року Папа римскый Франціск призначів за префекта Дікастерії про восточны церькви Преосвященого Клаудія Ґуджеротті, тітуларьного архієпіскопа равеллского, дотепершінёго апостольского нунція у Великобрітанії.

Свої обовязкы зачне выконовати з другой половины януара слїдуючого року. На тій посадїі вычерять кардінала Леонарда Сандрі, котрый досягнув 79 років віку, і котрого за префекта втогдышньой Конґреґації про восточны церькви призначів у 2007-ім роцї Папа Венедікт XVI., і потвердженый быв на тій посадї у 2014-ім роцї Папом Франціском.

Клаудіо Ґуджеротті народив ся у італійскім містї Верона 7-го октобра 1955-го року. Рукоположеный на священика быв 29-го мая 1982-го року. Штудовав орьєнталны языкы і літературу, а так само літурґіку. В роках 1981 аж 1984 учів патрістіку на Теолоґічнім інштітутї Сан Зено у Веронї, в роках 1982 аж 1985 теолоґію і высточну літурґіку на Інштітуті екуменічных штудій у Веронї.

Од 1985-го року робив у Римскій курії на Конґреґації про восточны церькви, і 17-го децембра 1997-го року быв призначеный за заступника секретаря той конґреґації. Так само учів патрістіку і армяньскый язык і літературу на Папскім восточнім інштітутї в Римі.

7-го децембра 2001-го року го Папа римскый Йоан Павел ІІ. призначів за апостольского нунція в Ґрузії і Арменії, як і за тітуларьного архієпіскопа з Равелла. Од 13-го децембра му прибыв і уряд апостольского нунція в Азербайджанї. Єпіскопске рукоположіня прияв з рук Вселеньского архієрея Йоана Павла ІІ. 6-го януара 2002-го року.

Од 2011-го року быв Папом Венедіктом XVI. призначеный за апостольского нунція в Білорусії. На тій посадї быв понад штири рокы, пак го Папа Франціск призначів у 2015-ім роцї за апостольского нунція на Українї, де быв аж до 2020-го року, коли быв призначеный за апостольского нунція у Великобрітанії.

Новый префект восточной дікастерії знає латиньскый, ґреческый, армяньскый – класічный і сучасный, анґліцькый, французькый, російскый, білоруськый і курдьскый язык.

Дікастерія про восточны церькви є дікастеріёв Римской курії і їй задачов є старати ся о 23 восточных церьквей, якы суть в єдности з Апостольскым престолом. Была основана у 1917-ім роцї як Конґреґація про восточны церькви. Папа римскый Франціск апостольсков конштітуціёв Praedicate evangelium ку 5-му юну того року змінив назву з конґреґації на Дікастерію про восточны церькви, інформує Інформачный центер Пряшівской архієпархії.

Петро МЕДВІДЬ, ЛЕМ.фм. Ґрафічна і языкова коректура: АРК в СР.